23-уми январи соли 2025 дар Палатаи ҳисоби Ҷумҳурии Тоҷикистон муаррифии раиси Палатаи ҳисоб баргузор гашт, ки дар он Муовини якуми Сарвазири Ҷумҳурии Тоҷикистон Ҳоким Холиқзода ва тамоми кормандони сохторҳои Палатаи ҳисоб иштирок намуданд.

Дар ҷаласа Пешниҳоди Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ дар бораи ба вазифаи раиси Палатаи ҳисоби Ҷумҳурии Тоҷикистон таъин намудани Каримзода Ҷамшед Абдураҳмон қироат карда шуд.

Муовини якуми Сарвазири мамлакат Ҳоким Холиқзода ба фаъолияти чандинсолаи Чиллазода Қ. ба ҳайси раиси Палатаи ҳисоби кишвар, ки аз ҷониби Пешвои муаззами миллат муҳтарам Эмомалӣ Раҳмон барои фаъолияти пурсамар баҳои баландро сазовор гаштааст, ба саҳми ҳамагон расонида ва ба корҳои минбаъдааш тансиҳатӣ, барору комёбиҳо орзу намуд.

Иттилоъ дода шуд, ки Каримзода Ҷамшед Абдураҳмон аз кадрҳои  болаёқати соҳаи иқтисоду молияи кишвар  буда, то ин дам дар вазифаҳои гуногун кор кардааст.

 Дар ҷаласа таъкид гардид, ки барои сазовор ба боварии Роҳбарияти Олӣ ва  пешрафти давлату миллат содиқона минбаъд низ кормандон фаъолияти худро  ба роҳ монанд.