Санаи 17 июни соли ҷорӣ, ҷаласаи навбатии ҳайати мушовара таҳти раёсати раиси Палатаи ҳисоби Ҷумҳурии Тоҷикистон муҳтарам Каримзода Ҷамшед баргузор гардид, ки дар кори он 6 масъала мавриди таҳлилу баррасӣ қарор дода шуд.

Дар ҷараёни ҷаласаи навбатии ҳайати мушовараи мазкур муовини раиси Палатаи ҳисоб Аҳмадзода Ш. сараудиторон, сардорони раёсатҳои мақомоти олии аудити кишвар иштирок намуданд.

Дар рафти ҷаласаи мазкур масъулин аз натиҷаи чорабиниҳои аудитории гузаронидашуда, аз ҷумла оид ба натиҷаи чорабинии аудитории Муассисаи давлатии хоҷагии ҷангали вилояти Суғд, оид ба натиҷаи аудити мутобиқат ва молиявии як қисм аз сохторҳои Вазорати меҳнат, муҳоҷират ва шуғли аҳолии Ҷумҳурии Тоҷикистон ва оид ба натиҷаи аудити мутобиқат ва молиявии Сарраёсати Хадамоти назорати давлатии тандурустӣ ва ҳифзи иҷтимоии аҳолӣ дар вилояти Суғд шунида шуд.

Ҳамчунин, дархости мақомотҳои ҳифзи ҳуқуқ, гузориши сардори шуъбаи ҳуқуқ вобаста ба пешниҳоди тағйиру иловаҳо ба Қонуни Ҷумҳурии Тоҷикистон “Дар бораи Палатаи ҳисоби Ҷумҳурии Тоҷикистон” ва дигар санадҳои меъёрии ҳуқуқӣ, мавриди баррасӣ қарор дода шуд.

Инчунин, гузориши муовини сардори раёсат Аҳмадзода Ф.З. ҷиҳати ворид намудани тағйирот дар Нақшаи чорабиниҳои татбиқи Лоиҳаи САSAI дар соли 2026 баррасӣ гардида, вобаста ба масъалаҳои баррасишаванда, қарорҳои дахлдор қабур гардид.

Дар фарҷом раиси Палатаи ҳисоби кишвар муҳтарам Каримзода Ҷамшед ҳозиринро ҷиҳати тақвият ва татбиқи аудити экологӣ, истифодаи шаффофияти маблағҳои буҷетӣ, омодагии сазовор аз ҷашни бузурги миллӣ 35 - солагии Истиқлоли давлатии Ҷумҳурии Тоҷикистон ва саҳм гузоштан дар корҳои ободониву созандагӣ ба ҳозирин дастурҳои мушаххас доданд.