11 декабри соли 2024 бо иштироки зиёда аз 80 нафар намоянда аз Маҷлиси намояндагони Маҷлиси Олии Ҷумҳурии Тоҷикистон, вазорату идораҳои кишвар, ташкилоту созмонҳои молиявии байналмилалӣ, Воситаҳои ахбори омма, ҷомеаи шаҳрвандӣ ва Мақоми олии аудити ҷумҳуриҳои Гурҷистону  Озарбойҷон, Нақшаи стратегии рушди Палатаи ҳисоби Ҷумҳурии Тоҷикистон барои солҳои 2024 -2028 муаррифӣ гардид.

Чорабиниро бо сухани ифтитоҳӣ, муовини раиси Палатаи ҳисоб Аҳмадзода Ф оғоз бахшиданд.

Дар ҷараёни муаррифии Стратегияи мазкур  қайд карда шуд, ки “Нақшаи стратегии рушди Палатаи ҳисоби Ҷумҳурии Тоҷикистон барои давраи солҳои 2024 – 2028” бо дар назар доштани анҷом ёфтани “Стратегияи рушди Палатаи ҳисоби Ҷумҳурии Тоҷикистон барои солҳои 2019 – 2023”, дар асоси “Стратегияи миллии рушди Ҷумҳурии Тоҷикистон барои давраи то соли 2030”, паёмҳои Президенти Ҷумҳурии Тоҷикистон, чолишҳо ва хавфҳои нав, Ҳадафҳои рушди устувор, инчунин, натиҷаи баҳодиҳии мустаќили берунаи сифати аудит  ва фикру андешаҳои ҷонибҳои манфиатдор таҳия карда шудааст.

Ташаккул додани идоракунии муносиби молияи давлатӣ ҷиҳати баланд бардоштани самаранокӣ ва шаффофият, таъмини ҳисоботдиҳӣ, нигоҳ доштани воқеият, мубориза бо коррупсия, дарёфти эътимоди ҷомеа ва мусоидат  барои ба даст овардан ва истифодаи мақсадноки захираҳои давлатӣ ба манфиати шаҳрвандони Тоҷикистон  вазифаҳои калидии Палатаи ҳисоб маҳсуб ёфта, ҳадафи стратегии Палатаи ҳисоб аз таъмини арзёбии самаранок, маќсаднок, шаффоф ва идоракунии масъулиятноки захираҳои давлатӣ иборат мебошад.

Такмил додани фаъолияти Палатаи ҳисоб ҳамчун мақоми олии аудити (МОА) давлатӣ, таъмини сифати аудит ва ҳисоботҳои аудиторӣ дар заминаи стандартҳои касбӣ аз рӯйи принсипҳои ISSAI, таъмини рушди нерӯи касбӣ  ва омӯзиш ҷорӣ намудани раванди натиҷанокии аудитҳои мутобиқат, молиявӣ ва самаранокӣ ва роҳандозии робитаи судманд бо ҷонибҳои манфиатдор мақсадҳои асосии ниҳоди олии аудити кишвар мебошад.

Дар ин ҳошия, роҳандозӣ намудани фаъолияти самараноки  Палатаи ҳисоби Ҷумҳурии Тоҷикистон барои  ноил гаштан ба ҳадафу афзалиятҳои Стратегии миллӣ ва идома додани ислоҳоти муҳими иқтисодӣ дар самти истифодаи маќсадноку самараноки  дороиҳои миллӣ, ҷиҳати коҳиш додани таъсири хавфҳои беруна ва дохилӣ, инчунин, баланд бардоштани рақобатпазирии иқтисоди миллӣ, дар заминаи ҷорӣ гардидани тартиби таъминоти молиявӣ бо мақсади гузаронидани аудити берунаи мустақили давлатӣ мусоидат хоҳад кард.

Сипас, дар натиҷаи муҳокимарониҳо иштирокчиён андешаҳои худро баён намуданд.

Дар  фарҷом  бо итминони комил баён гардид, ки бо шарофати дониш, таҷриба ва муносибати созанда мо метавонем роҳҳалҳоро дар татбиқи  стратегия пайдо кунем, ки на танҳо барои ҳалли мушкилоти мавҷуда кӯмак мекунад, балки заминаи рушди устуворро низ фароҳам меорад.